Äs isch ä Fritig im Dezämber 2019 gsii, da hei mir üs z’erste Mau gseh, das usemnä luschtigä Zuefau, aber keine vo üs zwöi het Inträsse am andere zeigt. Am Fasnachts-Donnstig 2020 hei mir üs de wieder troffe u ä lustigä Aabe mit sinä – ize ou minä Fründä verbracht, ou da hets noni gfunkt gha. Dank Corona und em nötige Sicherheitsabstand, hei mir üs nid chönne nöcher cho. Derfür hei mir ganz viu WhatsApp gschriebe u ä tolli Fründschaft isch entstande. Äntlich het meh wieder i Usgang dörfe, i bi mitäre Kollegin im Redjohn ghocket u wär lauft da plötzlich zuechä? Der Richi u sii Kolleg!
Zur später Stund hets gheisse: „Mir göi aui zur Romaine hei gah schlafe, sie wohnt am nächste vor Stadt 🤪 d’Schlafmöglichkeite sii fair ufteilt worde, aber woni nachem Bad i mis Schlafzimmer ha weue, liegt doch der Richi bi mir im Bett u meint: „I bi z’alt für ufem Sofa z’schlaafe!“ s’Gfühl, so vertraut aus würde mir üs scho eewigs kenne, isch der Start i üsi wunderschöni Liebesgschicht gsii…Scho glii drufabe isch üsi Liebi mit der Geburt vor Lennja krönt worde. Der gröscht Liebesbewiis dörfe mir sit denn, ah üsere Hand begleite.
Üsi Familie isch komplett u drum wette mir mit öich, üsi Liebi fiire u ä wunderschönä Taag verbringe.Romaine, Roger, Elina u Lennja ♥
I bi d’Romaine u meh chönnt säge, i bi äs ufgweckts – einzigartiges „Exemplar“. Aus Vollbluet Mami sorgeni derfür, dasses bi üs nie längwilig wird – am liebschte sii mir dusse ir Natur, öb mitem Velo oder de Wanderschueh, wo mir aui zäme d’Gägend unsicher mache. Näbebii bini Familiemanagerin, zuständig für aui üsi Termine u gah mit viu Fröid aus Usglich als medizinischei Praxisassistäntin mire bruefliche Liideschaft nache.
Wenni mau eifach d’Romaine cha sii u nid im Familiemodus bi, bini sehr gärn mit mim zuekünftig Maa ungerwägs oder mit üsnä Lieblingsmönsche u Fründe. Öb amne Schwingfest, Konzärt, Usfluug oder schaffe amne Pubfescht – zäme lache u Spass ha isch s’Motto! Und ja, äs stimmt, abem Summer 2025 bini wieder zrugg ir Guggemusig Chatzeschwänz. Weme einisch am Fasnachtsfieber verfalle isch, de chames nüm ändere, dass isch mir schliesslich id Wiege gleit worde am 11.11.1989.
Ufs Abentüür aus Frau u Maa dür s‘ Läbe gah fröie mi sehr, das macht üsi Familie komplett.
I fröie mi riiiiesig üse Taag mit öich z’firre u gniesse.
Ig bi dr Roger…unger de meischte bekannt aus „Richu“ oder „Richi“, was mängisch zu Namensverwirrige sorget. Bi sehr eifach gstrickt…mänglisch aber bi gwüssnigä Sache doch chli kompliziert und pedantisch. Do bini scho no froh , das i e Frou gfunge ha, wo mi so nimmt wie ni bi. Witer zu mir…bi e Person wo probiert aues richtig z mache, bi gern möglicht überau drbi, wöu i nüt wett verpasse im Läbe. Füelä mi wohl in Gsellschaft und gniesses Zit mit dr Romaine, üsnä Ching und mit mim liebschtä Umfeld. Ha gern wenn immer öbbis louft, drüberus bini e gniesser wo zwüschdüeä ou gern chli d Rueh gniesst, bimnä feinä Ässe oder bimne gmüetläche Apero. Do i gern mit üsnä Ching öbbis ungernimä, hets für mini Hobbys leider nüm so vöu Platz, aber bi immer e grosse Fan vo gueter Musik, sigs Live go lose oder ou mou uf dr eigetä Gitarre umezklimperä.
Standesamt & Apéro
Für aui die, wo ä Iiladig für die standesamtlichi Trouuig becho hei.
Standesamt isch am Fritig 26. Juni 2026 am 16.00 Uhr im Schloss Waldegg, Feldbrunnen St. Niklaus.
Aschliessend gits äs Apéro für Gäscht vor Standesamtliche Trouuig, wo sich agmäudet hei.
(Leider chöi nume die derbii sii, wo sich fürs Standesamt / Apéro agmäudet hei. Der QR Code isch uf öichere Iiladig.)
Apéro Buuchihof
Für aui die, wo ä Iiladig für’s Apéro VOREM Hochzystfescht becho hei.
s’Hochzytsfeschtapéro isch am Samstig 27. Juni 2026 ab de 14.00 bis 17.00 Uhr ufem Buuchihof in Bätterkinden.
dChing sii da härzlich Willkomme 🙂
(Leider chöi nume die am Apéro derbii sii, wo sich ou agmäudet hei. Der QR Code isch uf öichere Iiladig.)
Hochzytsfescht Buuchihof
Für aui die, wo ä Iiladig für’s Hochzystfescht becho hei.
s’Hochzytsfescht isch am Samstig 27. Juni 2026 ab de 14.00 Uhr ufem Buuchihof in Bätterkinden.
Bitte beachtet, dass dChing am Apéro vo 14:00 bis 17:00 Uhr härzlich Willkomme sii, aber am Aabe findet s’Ässe us Fescht ohni Ching statt!
(Leider chöi nume die derbii sii, wo sich für’s Apéro us Fescht agmäldet hei. Der QR Code isch uf öichere Iiladig.)
Dresscode fürs Fescht isch lässig – elgant. Äs isch auso nid Kravattepflicht. 🙂
Übernachte
Öb Schlafe im Stroh oder Zäutle ufem Rase
Ufem Buuchihof fingsch sicher ä Möglichkeit. Nimm doch grad säuber Kontakt uf u reservier dir dis Plätzli.
Das geit uf dini Chöschte.
Schön wetsch du/dir üs öbis zum Hochzyt schänke!
Das fröit üs wahnsinnig u wär ou nid nötig, da mir sehr glücklich si mit däm wo mir hei. Aber wenn du/dir üs ä grossi Fröid weit mache, chöit dir sehr gärn häufe üses Feriekässeli z’fülle. Das wärde mir bruche, für üsi langersehnti grösseri Reis as Meer mit der ganze Familie.
YourChoice Informatik GmbH
Deine Idee – unsere Umsetzung! 🚀
Bei YourChoice bekommst du alles, was du für deinen professionellen Online-Auftritt brauchst: moderne Websites, komplette Online-Shops und digitale Produkte wie Flyer, Broschüren oder Visitenkarten. Persönlich, unkompliziert und genau auf dich zugeschnitten. Wenn du Wert auf Qualität und einen verlässlichen Partner legst, bist du hier genau richtig.
Fotografik 11 – Fabienne Bommer-Büttler
Emotionen, die bleiben ✨
Bei Fotografik 11 werden besondere Momente in einzigartige Bilder verwandelt: von Babybauch- und Newbornshootings über Familienfotos bis hin zu Hochzeiten. Fabienne sorgt mit viel Herz, Kreativität und einem Auge fürs Detail für ein Erlebnis, bei dem du dich wohlfühlst – und Bilder erhältst, die dich ein Leben lang begleiten.
