Mit em Richu bi ig äng befründet sit über 20 Johr. Wow! Wenn me sech das so überleit… e mege längi Zyt. Könneglehrt heimer üs zu Bruefsschuelzyte überne gmeinsame Kolleg.
Bi üs hei d Sympathie vo afang ah gstumme und so ligts uf dr Hand, dass mir die wilde Usgangszyte zäme hei erlebt! Aber ou dernäbe hei mir vöu zäme gmacht… so zum Bispiel diversi Sunntigsusfährtli mit sim aute Honda, gmeinsami Konzertbsuech oder Poker- und Game-obene. Zudem hei mer üs gägesitig bi üsne Hobbys unterstützt: Dr Richu isch jedes Johr mis Theater cho luege (und sogar 2x zäme mit mir uf dr Bühni gstande) und ig ha natürlich ke Uftritt vor sinere früechere Rockband verpasst.
I de letschte 20 Johr simer zäme riifer und älter worde. Und s schönste isch: Dr äng Kontakt isch über au die Johr blibe. Au 5 Johr fiiremer zäme ä grossi Geburiparty mit all üsne gmeinsame Fründe und fiire s Läbe, d Fründschaft und s zämesii. Und wöu mir beidi z Biberist wohne und mir dr glich Fründeskreis hei, gseh ig die wunderbari jungi Familie vom Richu sowieso fasch jedes Wucheend.